ຂື້ນຊື່ວ່າ computer ຄົນລາວຢຸກ 2000 ນີ້ ຫຼາຍຄົນກໍ່ເຂົ້າໃຈແລ້ວວ່າມັນເປັນແນວໃດ ເຮັດຫຍັງໄດ້ແດ່ ຫາຊື້ໄດ້ຢູ່ໃສ ແຕ່ພໍຫລຽວຄືນໄປອາດີດ ເມື່ອປີ1984 ຄຳວ່າຄອມພີວເຕີ ເປັນເລື່ອງແຫ່ງຈີນຕະນາການ ຖ້າໄດ້ຍີນໃຜຜູ່ໃດເວົ້າເຖີງມັນ ບັນດາຫມູ່ໆໂດຍສະເພາະຜູ່ຊາຍ ກໍ່ຈະຫູພືງປາກອ້າ ຟັງຢ່າງບໍ່ມີພາດເລີຍທຸກປະໂຫຍກ.
ປະມານປີ 1985 ທີ່ສະຖາບັນແຫ່ງໜື່ງ ໄດ້ຮັບເຄື່ອງຊ່ອຍເຫລືອຈາກ UN ມີຄອມພິວເຕີ2ໜ່ວຍ ອາດຈະແມ່ນເຄື່ອງຄອມພິວເຕີ ຊຸດທຳອິດທີ່ເຂົ້າມາເຖີງເມືອງລາວ. ແຕ່ບໍ່ແມ່ນເລື່ອງງ່າຍໆ ທີ່ຈະໄດ້ເຫັນຫລືສຳພັດ ຣາຄາກໍ່ແພງ ຕ້ອງມີຄວາມຮູ້ສູງ ພາສາອັງກິດຟະຣັງຕ້ອງເກັ່ງ ເຖີງຈະໃຊ້ມັນໄດ້ ຕ່ອນນັ້ນມີພຽງອາຈານຊາຍໜຸ່ມສອງຄົນເທົ່ານັ້ນ ທີ່ມີສິດເຂົ້າໄປໃນຫ້ອງຄອມພິວເຕີ ສັງເກດເຫັນວ່າຫນ້າຕາອາຈານເພີ່ນເວລາເຂົ້າອອກຫ້ອງນັ້ນ ປານດາຣາຂື້ນເວທີ່ສະແດງ ພວກນັກຮຽນສາວໆພາກັນແຍງ ມອງດ້ວຍສາຍຕາອອນຊອນ ປານຖືກສະກົດຈິດ. ນີ້ແມ່ນເລື່ອງສັ້ນໆ ເລົ່າສຸ່ກັນຟັງພໍແກ້ເຫົງາ…
