ກອງປະຊຸມອາຊີ-ເອີຣົບ ຫລື ອາເຊັມ (Asia-Europe Meeting ຫລື ASEM) ໄດ້ຖືກສ້າງຕັ້ງຂຶ້ນໃນປີ 1996. ຈຸດປະສົງຂອງອາເຊັມແມ່ນເພື່ອເພີ່ມທະວີຄວາມເຂົ້າໃຈ, ສົ່ງເສີມ ແລະ ຮັດແຫນ້ນການຮ່ວມມືລະຫວ່າງພາກພື້ນອາຊີ ແລະ ເອີຣົບ. ຂອບການຮ່ວມມືຂອງອາເຊັມປະກອບດ້ວຍ 3 ເສົາຄ້ຳທີ່ສຳຄັນຄື: ການຮ່ວມມືດ້ານການເມືອງ, ເສດຖະກິດ ແລະ ວັດທະນະທຳ-ສັງຄົມ. ຕະຫລອດໄລຍະ 16ປີ ຜ່ານມາ, ໄດ້ມີການຈັດກອງປະຊຸມສຸດຍອດມາແລ້ວ 8ຄັ້ງ.
ກອງປະຊຸມສຸດຍອດອາເຊັມຄັ້ງທີ 8 ໄດ້ຈັດຂຶ້ນໃນວັນທີ 4-5 ຕຸລາ 2010 ທີ່ບຣຸກແຊນ, ປະເທດແບນຊິກ ເຊິ່ງໄດ້ຕົກລົງເຫັນດີໃຫ້ ສປປ ລາວ ເຊິ່ງແມ່ນປະເທດປະສານງານອາເຊັມຂອງອາຊຽນເປັນເຈົ້າພາບຈັດກອງປະຊຸມສຸດຍອດອາເຊັມຄັ້ງທີ 9 (ASEM9). ຕໍ່ບັນຫາດັ່ງກ່າວ, ລັດຖະບານ ແລະ ປະຊາຊົນແຫ່ງ ສປປ ລາວ ມີຄວາມພາກພູມໃຈເປັນຢ່າງຍິ່ງທີ່ໄດ້ຮັບກຽດ ແລະ ຄວາມໄວ້ວາງໃຈສູງຈາກບັນດາຄູ່ຮ່ວມອາເຊັມໃນການເປັນເຈົ້າພາບກອງປະຊຸມສຸດຍອດ ASEM 9 ເຊິ່ງກຳລັງຈັດຂຶ້ນໃນຂະນະນີ້ ຈາກວັນທີ 5-6 ພະຈິກ 2012 ທີ່ນະຄອນຫລວງວຽງຈັນ.
ລັດຖະບານ ແລະ ປະຊາຊົນລາວມີຄວາມປິຕິຊົມຊື່ນ ແລະ ຍິນດີເປັນຢ່າງຍິ່ງທີ່ໄດ້ຕ້ອນຮັບບັນດາປະມຸກລັດ, ຫົວຫນ້າລັດຖະບານ, ປະທານສະພາເອີຣົບ, ປະທານຄະນະກຳມາທິການເອີຣົບ ແລະ ເລຂາທິການໃຫຍ່ອາຊຽນທີ່ນຳພາຄະນະຜູ້ແທນ 51 ຄູ່ຮ່ວມອາເຊັມ ຈາກພາກພື້ນອາຊີ ແລະ ເອີຣົບ ເຂົ້າຮ່ວມກອງປະຊຸມສຸດຍອດ ASEM9ນີ້. ມັນເປັນການເສີມຂະຫຍາຍ ແລະ ຮັດແຫນ້ນການພົວ ພັນຮ່ວມມືລະຫວ່າງສອງພາກພື້ນໃຫ້ນັບມື້ນັບແຫນ້ນແຟ້ນຂຶ້ນກ່ວາເກົ່າ.
