ພິທີລົງນາມບົດບັນທຶກຄວາມເຂົ້າໃຈລະຫວ່າງສູນອິນເຕີເນັດແຫ່ງຊາດ (ສອຊ) ແລະ ບໍລິສັດ NTT Communications (NTT Com) ປະເທດຍີ່່ປຸ່ນ ໄດ້ມີຂຶ້ນວັນທີ 6 ຕຸລາ 2011 ຢູ່ ສອຊ ລະຫວ່າງ ທ່ານ ຄຳຄິດ ໄຊສົງຄາມ ຫົວໜ້າ ສອຊ ແລະ ທ່ານ Tsuyoshi Kavashima ປະທານບໍລິສັດ NTT Com ເຊິ່ງມີທ່ານ ທັນສະໄໝ ກົມມະສິດ ຮອງປະທານອົງການໄປສະນີໂທລະຄົມມະນາຄົມແຫ່ງຊາດ ພ້ອມດ້ວຍພະນັກງານກ່ຽວຂ້ອງເຂົ້າຮ່ວມ.
ການລົງນາມບົດບັນທຶກຄວາມເຂົ້າໃຈຄັ້ງນີ້ ສອຊ ມີຈຸດປະສົງໃນການເຊື່ອມຕໍ່ກັບລະບົບຂອງບໍລິສັດ NTT Com ເພື່ອສະໜອງການ ເຊື່ອມຕໍ່ລະບົບອິນເຕີເນັດ ແລະ ການສະໜອງການເຊື່ອມຕໍ່ໂທລະສັບຈາກ ສປປ ລາວ ເຂົ້າສູ່ລະບົບເຄືອຂ່າຍ Tier-1 ສາກົນໂດຍກົງ ເຊິ່ງຈະຊ່ວຍໃຫ້ລາຄາຊື້ ການເຊື່ອມຕໍ່ອິນເຕີເນັດຫຼຸດລົງ ແລະ ມັນຍັງເພີ່ມຄຸນນະພາບຂອງການໃຊ້ບໍລິການອິນເຕີເນັດດີຂຶ້ນຕື່ມ ເຊິ່ງພາຍຫຼັງການລົງນາມບົດບັນທຶກນີ້ແລ້ວ ສອຊ ແລະ ບໍລິສັດ NTT Com ຈະສືບຕໍ່ຮ່ວມກັນໃນການຄົ້ນຄວ້າຫາເງື່ອນໄຂທີ່ເໝາະສົມ ໃນການສະໜອງການໃຫ້ການບໍລິການອິນເຕີເນັດ ໃຫ້ແກ່ ສປປ ລາວ ທັ້ງນີ້ກໍເພື່ອຮອງຮັບໃຫ້ການຊົມໃຊ້ອິນເຕີເນັດທີ່ເພີ່ມຂຶ້ນ ແລະ ແນໃສ່ໃຫ້ປະຊາຊົນບັນດາເຜົ່າໄດ້ເຂົ້າເຖິງ ແລະ ຊົມໃຊ້ອິນເຕີເນັດໃນລາຄາຖືກ.
